ಶಿವಮೊಗ್ಗ,ನ.20 : ಕರ್ಕಶ ಹಾರನ್‌ ಬಳಸುತ್ತಿದ್ದ ಖಾಸಗಿ ಬಸ್‌ ಚಾಲಕರಿಗೆ ಸಂಚಾರ ಠಾಣೆ ಪೊಲೀಸರು ಬಿಸಿ ಮುಟ್ಟಿಸಿದ್ದಾರೆ. ಖಾಸಗಿ ಬಸ್‌ ನಿಲ್ದಾಣದಲ್ಲಿ ದಿಢೀರ್‌ ದಾಳಿ ನಡೆಸಿದ ಸಂಚಾರ ಪೊಲೀಸರು, ಕರ್ಕಶ ಹಾರನ್‌ ಹೊಂದಿದ್ದ 15ಕ್ಕೂ ಹೆಚ್ಚು ಬಸ್‌ಗಳಿಗೆ ದಂಡ ವಿಧಿಸಿದ್ದಾರೆ.
ಸಂಚಾರ ಠಾಣೆ ಇನ್ಸ್‌ಪೆಕ್ಟರ್‌ ಸಂತೋಷ್‌ ಕುಮಾರ್‌ ಮಾರ್ಗದರ್ಶನದಲ್ಲಿ ಪಶ್ಚಿಮ ಸಂಚಾರ ಠಾಣೆಯ ಪಿಎಸ್‌ಐ ತಿರುಮಲೇಶ್‌, ಎಎಸ್‌ಐಗಳಾದ ಕೃಷ್ಣಪ್ಪ, ಮೋಹನ್‌ ಮತ್ತು ಸಿಬ್ಬಂದಿ ದಾಳಿ ನಡೆಸಿದ್ದರು. ಕರ್ಕಶ ಹಾರನ್‌ ಬಳಕೆ ಮಾಡುತ್ತಿದ್ದ ಬಸ್ಸುಗಳ ಶೋಧ ನಡೆಸಲಾಯಿತು. ಸ್ಥಳದಲ್ಲೇ ಹಾರನ್‌ ಬಳಸಿ, ದಂಡ ವಿಧಿಸಲಾಯಿತು.
ಇನ್ಮುಂದೆ ಕರ್ಕಶ ಹಾರನ್‌ ಬಳಕೆ ಮಾಡುವಂತಿಲ್ಲ ಎಂದು ಬಸ್‌ ಚಾಲಕರು, ನಿರ್ವಾಹಕರು ಮತ್ತು ಮಾಲೀಕರಿಗೆ ಸಂಚಾರ ಪೊಲೀಸರು ಎಚ್ಚರಿಕೆ ನೀಡಿದರು. ಕರ್ಕಶ ಹಾರನ್‌ ಬಳಕೆ ಮಾಡಿದ ಬಸ್‌ಗಳಿಗೆ ತಲಾ 500 ರೂ. ದಂಡ ವಿಧಿಸಲಾಗಿದೆ.
